അടുത്തിടെ ഒരു പെണ്‍കുട്ടി എന്റെയടുക്കലെത്തി. മുന്നു വര്‍ഷമായി എപ്പോഴും ടെന്‍ഷന്‍, ആരോടും സംസാരിക്കാന്‍ പറ്റുന്നില്ല. ആത്മീയമായ ചില ചികിത്സകള്‍ നടത്തിയിരുന്നു. വലിയ പുരോഗതിയൊന്നും ഉണ്ടായില്ല. കൗണ്‍സിലറെയോ ഡോക്ടറെയോ സമീപിച്ചാല്‍ മറ്റുള്ളവര്‍ ഭ്രാന്താണെന്നു കരുതില്ലേ, അതുകൊണ്ട് സമീപിച്ചില്ല. ദിവസം കഴിയുംതോറും ഉറക്കം നഷ്ടപ്പെടുന്നു. ആരാധനകള്‍ മറക്കുന്നു. സ്വന്തം ശരീരത്തെപ്പോലും വെറുക്കുന്ന ഒരവസ്ഥ. ഒന്നിലും ശ്രദ്ധിക്കാന്‍ പറ്റുന്നില്ല. എന്നിങ്ങനെ നിരവധി പ്രശ്‌നങ്ങള്‍ അവള്‍ അവതരിപ്പിച്ചു.
ലോകത്ത് ഏറ്റവും സാധാരണമായ മാനസിക വൈകല്യങ്ങളിലൊന്നാണ് വിഷാദം. വിഷാദവുമായി ബന്ധപ്പെട്ട പ്രശ്നങ്ങളുമായി ഓരോ ദിവസവും അനവധിപേരാണ് എന്റെയടുക്കൽ വരുന്നത്. എപ്പോഴും ടെന്‍ഷന്‍, നെഞ്ചില്‍ എന്തോ ഭാരം പോലെ, എല്ലാവരോടും ദേഷ്യം, ഒരു ചടങ്ങിലും സൽകാരത്തിലും പങ്കെടുക്കാനാവാത്ത, ഭ്രാന്താണോ മരിച്ചുപോവുമോ എന്ന അവസ്ഥ തുടങ്ങിയ പലതാണ് ഇവരുടെ പ്രശ്നങ്ങൾ. പലരും പല ചികിത്സകളും തേടുന്നു. പക്ഷേ, യഥാര്‍ത്ഥ പ്രശ്‌നം മനസിലാവാതെ ദീര്‍ഘകാലം ചികിത്സക്കു വിധേയമാകുകയോ നിത്യദുഃഖത്തിലകപ്പെടുകയോ ചെയ്യുന്നു.
എന്റെ അടുക്കല്‍ വന്ന പെണ്‍കുട്ടിക്ക് ആവശ്യം ഒരഭയമായിരുന്നു. തന്നെ കേള്‍ക്കാന്‍ ഒരാള്‍. അത് ഒരു ഡോക്ടര്‍ വേണമെന്നില്ല. ഉള്ളിലുള്ള പ്രശ്‌നങ്ങള്‍ പങ്കുവെക്കാന്‍ പറ്റിയ ഏതെങ്കിലും ഒരാള്‍. പ്രശ്‌നങ്ങള്‍ കേട്ട് പരിഹാരം പറയാന്‍ പറ്റിയ ആള്‍. അങ്ങനെ ഒരാള്‍ ഉണ്ടായിരുന്നെങ്കില്‍ അവള്‍ക്ക് ഇങ്ങനെ ഒരു അവസ്ഥ നേരിടേണ്ടിവരില്ലായിരുന്നു. എല്ലാ മനുഷ്യരും ഉള്ളിലുള്ള പ്രശ്‌നങ്ങള്‍ പങ്കുവെക്കാന്‍ ഒരാളെ ആഗ്രഹിക്കും. അതിനു സാധിക്കാതെ പ്രശ്‌നങ്ങള്‍ ഉള്ളിലിരുന്നു പുകയുന്ന അവസ്ഥ പതിയെ വിഷാദത്തിലേക്കു നയിച്ചേക്കാം.
എന്താണ് മാനസികാരോഗ്യം?
നമ്മുടെ വൈകാരികവും മാനസികവും സാമൂഹികവുമായ ക്ഷേമമാണ് മാനസികാരോഗ്യം. നമ്മള്‍ ചിന്തിക്കുന്നതും അനുഭവിക്കുന്നതും പ്രവര്‍ത്തിക്കുന്നതും മാത്രമല്ല. സമ്മര്‍ദം കൈകാര്യം ചെയ്യുന്ന രീതി, മറ്റുള്ളവരുമായുള്ള ബന്ധപ്പെടലുകള്‍, തിരഞ്ഞെടുപ്പുകള്‍ എന്നിവയിലെല്ലാം മാനസികാരോഗ്യം സ്വാധീനം ചെലുത്തുന്നു.
കേവലം വൈകാരികപ്രശ്‌നങ്ങളില്‍ ഒതുങ്ങുന്നതല്ല മാനസികാരോഗ്യം. ദമ്പതികളുടെ സ്വരച്ചേര്‍ച്ചയില്ലായ്മ, രക്ഷിതാവിന്റെയും കുട്ടിയുടെയും ഇടയിലെ അഭിപ്രായ വ്യത്യാസം, ജോലി ഉടമയും തൊഴിലാളിയും തമ്മിലുള്ള മോശം അവസ്ഥ തുടങ്ങി പല സാഹചര്യങ്ങളും മാനസികാരോഗ്യത്തിന് തകരാറുണ്ടാക്കിയേക്കാം. അത്തരം സാഹചര്യങ്ങളില്‍ കൗണ്‍സിലര്‍ക്ക് അല്ലെങ്കില്‍ തെറാപ്പിസ്റ്റിന് അവരുടെ പ്രശ്‌നങ്ങള്‍ പരിഹരിക്കാന്‍ കഴിഞ്ഞേക്കും. മാനസികരോഗം ജീവശാസ്ത്രപരമായ ഘടകങ്ങളാലോ ജീവിതാനുഭവങ്ങളാലോ കുടുംബപരമായ ഘടകങ്ങൾ കൊണ്ടോ ഉണ്ടാകുന്നതാണെങ്കിലും, പ്രാപ്തനായ ഒരാളുടെ സഹായത്തിലൂടെ പരിഹാരം ലഭ്യമാണെന്ന് അറിയേണ്ടത് പ്രധാനമാണ്.
പൊതുവായ മാനസികാരോഗ്യ പ്രശ്‌നങ്ങള്‍ എന്തൊക്കെയാണ്?
സമ്മര്‍ദം – ശാരീരികവും വൈകാരികവും പെരുമാറ്റപരവുമായ വൈകല്യങ്ങള്‍ക്ക് സമ്മര്‍ദം കാരണമാകും. അത് ആരോഗ്യത്തെയും മനഃസമാധാനത്തെയും ബന്ധങ്ങളെയും ബാധിക്കും. അമിതമായ സമ്മര്‍ദം, ഉറക്കമില്ലായ്മ, നടുവേദന, തലവേദന തുടങ്ങിയ ചെറിയ രോഗങ്ങള്‍ക്ക് കാരണമാകും. ക്രമേണ ഉയര്‍ന്ന രക്തസമ്മര്‍ദം, ഹൃദ്രോഗം തുടങ്ങിയ ജീവന്‍ അപകടപ്പെടുത്തുന്ന രോഗങ്ങളില്‍ വരെ എത്തിയേക്കാം.
ഉത്കണ്ഠാ വൈകല്യം – സമ്മര്‍ദം ഉണ്ടാക്കുന്ന ഒരു സംഭവത്തില്‍ നിന്ന് സ്വതന്ത്രമായ കാര്യങ്ങളെക്കുറിച്ചുള്ള അമിതമായ ഭയം, ഉത്കണ്ഠ ഉണ്ടാവുന്നു. ഉറക്കം, പരിഭ്രാന്തി, കൈകള്‍ വിയര്‍ക്കല്‍, വരണ്ട വായ, ശ്വാസതടസ്സം, ശാന്തത പാലിക്കാന്‍ കഴിയായ്ക തുടങ്ങിയ പ്രശ്‌നങ്ങള്‍ പൊതു ലക്ഷണങ്ങളില്‍ ഉള്‍പ്പെടുന്നു.
പാനിക് അറ്റാക്ക്- പെട്ടെന്നുള്ള ഭയത്തിന്റെയും അസ്വസ്ഥതയുടെയും ആവിര്‍ഭാവം മിനിട്ടുകള്‍ക്കുള്ളില്‍ അതിന്റെ ഉച്ചസ്ഥായിയിലെത്തുകയും ഇനിപ്പറയുന്ന ലക്ഷണങ്ങള്‍ കാണിക്കുകയും ചെയ്യുന്നു: വർധിച്ച ഹൃദയമിടിപ്പ്, വിറയല്‍, വിയര്‍പ്പ്, ഓക്കാനം, ശ്വാസംമുട്ടല്‍, നെഞ്ചുവേദന, തലകറക്കം, നിയന്ത്രണം നഷ്ടപ്പെടുമോ എന്ന ഭയം, മരിക്കുമോ എന്ന ഭയം, മരവിപ്പ്.
മേജര്‍ ഡിപ്രസീവ് ഡിസോര്‍ഡര്‍ – നിരന്തരമായ നിരാശ അനുഭവപ്പെടുക. ജോലി ചെയ്യാനും ഉറങ്ങാനും ഭക്ഷണം കഴിക്കാനും മറ്റു കാര്യങ്ങള്‍ ആസ്വദിക്കാനുമുള്ള വ്യക്തിയുടെ കഴിവിനെ ബാധിക്കുന്ന രോഗലക്ഷണങ്ങള്‍ ഉണ്ടാവുക. ചിലപ്പോള്‍ ഒരിക്കല്‍ മാത്രം സംഭവിക്കുന്നു. എന്നാല്‍ ജീവിതത്തിലുടനീളം നിരവധി തവണ പ്രത്യക്ഷപ്പെടുകയും ആവാം.
ദാമ്പത്യപ്രശ്നങ്ങള്‍ – ശാരീരിക പീഡനം, മാനസിക പീഡനം, ഇണകളും കുടുംബാംഗങ്ങളും തമ്മിലുള്ള പൊതുവായ തര്‍ക്കങ്ങള്‍.
എന്താണ് ഡിപ്രഷന്‍?
സങ്കടകരമായ ഒരു മാനസികാവസ്ഥ വളരെക്കാലം നീണ്ടുനില്‍ക്കുകയും സാധാരണ, ദൈനംദിന പ്രവര്‍ത്തനങ്ങളില്‍ ഇടപെടുകയും ചെയ്യുമ്പോള്‍ നിങ്ങള്‍ വിഷാദത്തിലായേക്കാം. വിഷാദരോഗത്തിന്റെ ലക്ഷണങ്ങള്‍ പറയാം: സങ്കടമോ ഉത്കണ്ഠയോ തോന്നുന്നു, രസകരമായ പ്രവര്‍ത്തനങ്ങള്‍ ചെയ്യാന്‍ ആഗ്രഹിക്കുന്നില്ല, ക്ഷോഭം, പെട്ടെന്നുള്ള നിരാശ, അസ്വസ്ഥത, വളരെ നേരത്തെ എഴുന്നേല്‍ക്കുക, വളരെയധികം ഉറങ്ങുക, പതിവിലും കൂടുതലോ കുറവോ ഭക്ഷണം കഴിക്കുക, വിശപ്പില്ലായ്മ, ചികിത്സിച്ചിട്ടും മാറാത്ത വേദന, തലവേദന, വയറുവേദന, ശ്രദ്ധ കേന്ദ്രീകരിക്കുന്നതിനോ വിശദാംശങ്ങള്‍ ഓര്‍മിക്കുന്നതിനോ തീരുമാനങ്ങള്‍ എടുക്കുന്നതിനോ അനുഭവിക്കുന്ന പ്രശ്‌നങ്ങള്‍, നല്ല ഉറക്കത്തിനു ശേഷവും ക്ഷീണം, കുറ്റബോധം, നിസ്സഹായത അനുഭവപ്പെടല്‍, ആത്മഹത്യയെക്കുറിച്ചോ സ്വയം വേദനിപ്പിക്കുന്നതിനെക്കുറിച്ചോ ഉള്ള ചിന്ത തുടങ്ങിയ അവസ്ഥ അനുഭവിക്കുന്നവര്‍ ഒരു മാനസികാരോഗ്യ പ്രൊഫഷണലിനെ കാണുന്നത് നല്ലതായിരിക്കും. വിഷാദ രോഗമുണ്ടോ എന്ന് സംശയിക്കുന്നുവെങ്കില്‍ ഉടന്‍ ഡോക്ടറുമായോ മാനസികാരോഗ്യ പ്രൊഫഷണലുമായോ സംസാരിക്കുക. ലക്ഷണങ്ങള്‍ വഷളാകുകയോ ദൈനംദിന പ്രവര്‍ത്തനങ്ങളെ ബാധിക്കുകയോ ചെയ്താല്‍ പിന്നീട് സങ്കീര്‍ണമായിത്തീരാനിടയുണ്ട്.
എന്തുകൊണ്ട് വിഷാദരോഗം?
വിഷാദരോഗത്തിന്റെ കൃത്യമായ കാരണം അജ്ഞാതമാണ്. പല കാരണങ്ങളും വിഷാദരോഗത്തിലേക്കു നയിക്കുമെന്ന് കണ്ടെത്തിയിട്ടുണ്ട്. ശാരീരികമോ ലൈംഗികമോ ആയി ദുരുപയോഗം ചെയ്യപ്പെടുക, പ്രിയപ്പട്ടവരുടെ മരണം, സാമ്പത്തിക പ്രശ്‌നങ്ങള്‍, ക്യാന്‍സര്‍, സ്‌ട്രോക്ക്, വിട്ടുമാറാത്ത വേദന, ചില മരുന്നുകളുടെ പാര്‍ശ്വഫലം, മദ്യം, മയക്കമരുന്ന് ഇവയെല്ലാം വിഷാദത്തിലേക്ക് നയിക്കും. ഉപയോഗിക്കുന്ന മരുന്നുകള്‍ വിഷാദത്തിന് കാരണമാകുമോ എന്ന് സംശയമുണ്ടെങ്കില്‍ ഡോക്ടറോട് സംസാരിച്ച് ഉറപ്പുവരുത്തേണ്ടതാണ്.
ആര്‍ക്കാണ് വിഷാദരോഗം വരുന്നത്?
ഏതു പ്രായത്തിലും ഏതു തരം വ്യക്തികള്‍ക്കും വിഷാദമുണ്ടാകാം. വിഷാദരോഗം അനുഭവിക്കുന്ന പലര്‍ക്കും മറ്റു മാനസികരോഗ അവസ്ഥകളും ഉണ്ട്. ഉത്കണ്ഠ, ഭയം, പരിഭ്രാന്തി എന്നിവയുടെ തീവ്രവും അനിയന്ത്രിതവുമായ വികാരങ്ങളുമായി വിഷാദരോഗികൾ പോരാടുന്നു. ഈ വികാരങ്ങള്‍ ദൈനംദിന പ്രവര്‍ത്തനങ്ങളില്‍ ഇടപെടുകയും ദീര്‍ഘകാലം നിലനില്‍ക്കുകയും ചെയ്യും.
വിഷാദത്തിന്റെയും ഉത്കണ്ഠയുടെയും മൂലകാരണം എന്താണ്?
കുടുംബ പശ്ചാതലം: ഉത്കണ്ഠ, വിഷാദം അല്ലെങ്കില്‍ മറ്റൊരു മാനസിക രോഗത്തിന്റെ കുടുംബ പശ്ചാതലമുണ്ടെങ്കില്‍ നിങ്ങള്‍ക്ക് ഉത്കണ്ഠയും വിഷാദവും ഉണ്ടാകാനുള്ള സാധ്യത കൂടുതലാണ്.
കുട്ടിക്കാലത്തെ ആഘാതം: കുട്ടിക്കാലത്തെ സമ്മര്‍ദഭരിതമായ അനുഭവങ്ങള്‍ നിങ്ങളുടെ ശരീരം ഭയത്തോടും വിഷമിപ്പിക്കുന്ന സാഹചര്യങ്ങളോടും പ്രതികരിക്കുന്ന രീതിയെ സ്വാധീനിക്കും.
ചികിത്സകള്‍ എന്തൊക്കെയാണ്?
വിഷാദരോഗത്തിന് സഹായകമായ നിരവധി ചികിത്സകള്‍ ലഭ്യമാണ്. വിഷാദരോഗത്തിനുള്ള ചികിത്സ രോഗലക്ഷണങ്ങള്‍ കുറയ്ക്കാനും വിഷാദദൈര്‍ഘ്യം ചുരുക്കാനും സഹായിക്കും. ചികിത്സയില്‍ തെറാപ്പി സ്വീകരിക്കുന്നതും കൂടാതെ മരുന്നുകള്‍ കഴിക്കുന്നതും ഉള്‍പ്പെടാം. ഏതു ചികിത്സയാണ് ഏറ്റവും അനുയോജ്യമെന്ന് നിര്‍ണയിക്കാന്‍ ഡോക്ടര്‍ക്കോ യോഗ്യതയുള്ള ഒരു മാനസികാരോഗ്യ പ്രൊഫഷണലിനോ നിങ്ങളെ സഹായിക്കാനാകും.
ആത്മീയ ചികിത്സകള്‍ പരിഹാരമാണോ?
ചികിത്സയുടെ പേരുകള്‍ക്കല്ല പ്രധാനം. മാനസികാരോഗ്യ ശുശ്രൂഷയില്‍ പരിശീലനം നേടിയിട്ടുണ്ടോ എന്നാണ് ശ്രദ്ധിക്കേണ്ടത്. മിക്ക ആത്മീയ ചികിത്സകരും അത്തരം പരിശീലനം നേടാത്തവരാവും. അവരെ സമീപിക്കുന്നത് ഗുണത്തിലേറെ ദോഷം ചെയ്യും. അത്തരം പരിശീലനം നേടിയ ചികിത്സകരാണെന്ന് ഉറപ്പാണെങ്കില്‍ അവരുടെ കൈയില്‍ പരിഹാരവും ഉണ്ടാവുമല്ലോ? എങ്കിലും മാനസികാരോഗ്യ പ്രൊഫഷണലുകളെ സമീപിക്കണം. രോഗത്തിനനുസരിച്ചുള്ള ചികിത്സ തേടാനാണല്ലോ ഇസ്‌ലാം പറയുന്നത്.
വിഷാദവും ഇസ്‌ലാമും
നമ്മള്‍ അമാനുഷികരാകണമെന്ന് ഇസ്‌ലാം ആവശ്യപ്പെടുന്നില്ല. ഒരാള്‍ക്ക് നെഗറ്റീവ് വികാരങ്ങള്‍ അനുഭവപ്പെടുകയാണെങ്കില്‍, സാധ്യമെങ്കില്‍ പോസിറ്റീവ് ചിന്തകളും പ്രവര്‍ത്തനങ്ങളും ഉപയോഗിച്ച് അവയെ ചെറുക്കാനോ അല്ലെങ്കില്‍ പ്രൊഫഷണല്‍ സഹായം തേടാനോ ഇസ്‌ലാം പ്രോത്സാഹിപ്പിക്കുന്നു.
സന്തുലിതാവസ്ഥ തകരാറിലാകുമ്പോഴാണ് ആളുകള്‍ക്ക് വിഷാദം പിടിപെടുന്നത്. ഈ സാഹചര്യത്തില്‍ ഇസ്‌ലാം വികാരത്തെ അപലപിക്കാനല്ല ആവശ്യപ്പെടുന്നത്. മറിച്ച് മാനസികവും ശാരീരികവുമായ സന്തുലിതാവസ്ഥ വീണ്ടെടുക്കുന്നതിനുള്ള പരിഹാരം കണ്ടെത്താനാണ്.
മാനസികാരോഗ്യവും ഇസ്‌ലാമും
ആത്മീയ പ്രതിരോധം: വിശ്വാസികള്‍ക്ക് ആന്തരിക ശക്തി ഉപയോഗിച്ച് സമാധാനപരമായ ജീവിതം നയിക്കാന്‍ ഇസ്‌ലാം സഹായിക്കുന്നുണ്ട്. അനശ്വരനായ അല്ലാഹുവുമായി ശക്തമായ ബന്ധം പുലര്‍ത്തുന്നതിലൂടെ അവരുടെ വികാരങ്ങള്‍ ശുദ്ധീകരിക്കുന്നു. ശാന്തമായ മനസ്സും ആരോഗ്യകരമായ ബോധവും പോസിറ്റീവ് ചിന്തകളും ഉള്ള ഒരു ആന്തരിക ശക്തി എന്ന നിലയില്‍ ആത്മീയ പ്രതിരോധത്തിന്റെ പ്രാധാന്യം ഇസ്‌ലാം അംഗീകരിക്കുന്നു.
ക്ഷമയുടെ പങ്ക്: ക്ഷമയ്ക്ക് വലിയ പ്രാധാന്യം കല്‍പ്പിക്കുന്നുണ്ട് ഇസ്‌ലാം. ഇത് ഖുര്‍ആനിലെ 200 ഓളം സൂക്തങ്ങളില്‍ പ്രത്യക്ഷമായും മറ്റു പലതിലും പരോക്ഷമായും പരാമര്‍ശിക്കുകയും ചെയ്യുന്നു. പ്രതികൂല സാഹചര്യങ്ങളിലും ആവര്‍ത്തിച്ചുള്ള പ്രകോപനങ്ങളിലും വ്യതിചലിക്കാതെ, അര്‍ഹമായ ലക്ഷ്യങ്ങളിലേക്ക് മുന്നേറാന്‍ മുസ്‌ലിംകളെ പ്രാപ്തരാക്കുന്ന ഗുണവിശേഷണമാണ് ക്ഷമ.
അല്ലാഹുവില്‍ വിശ്വാസമുണ്ടെങ്കില്‍ അവര്‍ക്ക് വിഷാദമോ മാനസികരോഗമോ ഉണ്ടാവില്ല, അല്ലേ?
ഒരു വിശ്വാസി എന്ന നിലയില്‍, മറ്റുള്ളവരെപ്പോലെ ജീവിതത്തിലെ പ്രശ്നങ്ങളും അസ്വസ്ഥജനകമായ ചിന്തകളും നിങ്ങളെ ബാധിക്കുന്നു. പ്രതിസന്ധിയെ അഭിമുഖീകരിക്കുമ്പോള്‍ പൂര്‍ണമായും നഷ്ടപ്പെട്ടുവെന്നും ഏകാന്തത അനുഭവിക്കുന്നുവെന്നും തോന്നുന്ന ഒരാള്‍ക്ക് നിസ്സഹായതയും വിഷാദവും അനുഭവപ്പെടും. എന്നാല്‍ ആത്മാര്‍ഥമായി കരുതുന്ന, നിരാശാജനകമായ അഭ്യര്‍ഥനകള്‍ കേള്‍ക്കുന്ന, ഉദാരമായ സഹായം നല്‍കുന്ന ഒരു ദയാലുവായ ദൈവത്തിന്റെ പിന്തുണ അനുഭവപ്പെടുന്ന ഒരാള്‍ക്ക്, ജീവിതത്തെ നേരിടാന്‍ ശക്തമായ സഹായഹസ്തം ഉള്ളതിനാല്‍, വളരെ വേഗത്തില്‍ ട്രാക്കില്‍ തിരിച്ചെത്താനുള്ള മികച്ച അവസരമുണ്ട്. എന്നാല്‍ നിങ്ങള്‍ എവിടെ നിന്നാണ് വന്നത്, എവിടേക്ക് പോകുന്നു, എന്തിനാണ് എന്നതിന്റെ വ്യക്തമായ ഒരു ധാരണ നിങ്ങള്‍ക്കുണ്ടെങ്കില്‍ ഈ അവസ്ഥ വളരെ നന്നായി കൈകാര്യം ചെയ്യാന്‍ കഴിയും, അതിനാല്‍ നിങ്ങള്‍ക്ക് ഒരു തുടക്കമുണ്ട്. ആ തുടക്കം അല്ലാഹുവില്‍ നിന്നാണ്.
“അല്ലാഹുവിനെ ഭയപ്പെടുന്നവര്‍ക്കായി, അവന് എപ്പോഴും ഒരു പോംവഴി തയാറാക്കുന്നു, അവനു സങ്കല്‍പ്പിക്കാന്‍ പോലും കഴിയാത്ത സ്രോതസ്സുകളില്‍ നിന്ന് അവന് അവനുവേണ്ടി നല്‍കുന്നു. ആരെങ്കിലും അല്ലാഹുവില്‍ ഭരമേൽപ്പിച്ചാല്‍ അവന് അല്ലാഹു മതി. തീര്‍ച്ചയായും അല്ലാഹു അവന്റെ ഉദ്ദേശ്യം നിറവേറ്റുക തന്നെ ചെയ്യും: തീര്‍ച്ചയായും എല്ലാത്തിനും അല്ലാഹു ഒരു നിശ്ചിത അനുപാതം നിശ്ചയിച്ചിട്ടുണ്ട്”(ഖുര്‍ആന്‍ 65:2-3).
ഡോ. ഫാദില
എപ്പോഴാണ് വിഷാദമുണ്ടാകുന്നത് ? added by രിസാല on
View all posts by രിസാല →
You must be logged in to post a comment Login